Atur Pambagyo Lamaran

ATUR PAMBAGYO LAMARAN

Assalamu’alaikum Wr. Wb.

Nuwun, para pinisepuh, sesepuh ingkang pinunggi, ingkang kinurmatan para kadang duta saraya saking calon besan sarta para lenggah kakung putri ingkang bahagya mulya.

Kaparenga kula matur karana kula piniji panjenenganipun Bp. JONO, BA sekaliyan kinen ngaturaken pambagyoharjo ing kalenggahan punika.

Purwakaning atur sumangga kula dherekaken ngaturaken puji syukur wonten ngarsanipun Alloh SWT awit panjenengan sedaya dalasan kula tasih saget makempal nyawiji  kanthi wilujeng.

Para lenggah ingkang kinurmatan. Bp. JONO, BA sekaliyan lumantar kula hangambali atur sugeng rawuh awit karawuhan panjenengan sekaliyan. Sinarengan raos panuwun mugi kaparenga panjenengan ipun para lenggah kasuwun lelenggahan kanthi sekeca.

Salajengipun nadyan panjenengan sekaliyan sampun nguningani bilih ing nguni panjenenganipun Bp. JONO, BA sekaliyan garwa sampun gumolongaken pirembagakan kaliyan panjenenganipun Bp. DANIEL YAVENTIUS DAGA  karana sami-sami netepi darmaning asepuh nedya angraketaken balung kapisah daging angrenggang ing atawisipun Bp. DANIEL YAVENTIUS DAGA  sekaliyan garwa kagungan putra ingkang kekasih Bg. YOHANES PASCALIS DWINANDA DAGA, ST panjenengan Bp. JONO, BA sekaliyan hanggandahi putri kanthi sesilih Rr. CHRISTINA DHANIK TRI AGUSTIN, SE.

Inggih awit samudayanipun sampun manunggal, cipta rasa miwah karsanipun ing kalenggahan punika badhe/ (sampun) kaleksanaaken tata upacara pasrah-panampining upakarti winastan lamaran saha walimahan. Mugi-mugi lekas wekasing sedya saged kasembatan ingkang sami ginayuh, panyuwunipun Bp JONO, BA sekaliyan mugi wontena jumurunging pamuji para lenggah sedaya hanggennya Bp. JONO, BA sekaliyan badhe / (sampun) nampi pasrahipun kadang besan tansah manggih basuki.

Hambokbilih Bp. JONO, BA sekaliyan sumrambah para keluarga anggenipun nampi karawuhan panjenengan wonten kekiranganipun Bp. JONO, BA sekaliyan nyuwun pangapunten.

Ing wasana aturipun Bp. JONO, BA sekaliyan lumantar kula hambokbilih wonten atur kula ingkang mboten mranani mugi paring pangapunten.

Wekdal kula aturaken kadang panata cara.

Wassalamu’alaikum Wr. Wb.

Parangjoro, 17 Nopember 2010

KRT. Aris Yuwono Cahyaningrat