Atur Pambagyo Harjo Lamaran

WINANTU SAGUNGGING PAKURMATAN

Assalamu’alaikum Wr. Wb.

Sesepuh pinisepuh ingkang kula bekteni.

Sagung para tamu, langkung-langkung keluarga besan ingkang kula kurmati, mandhapipun para kridha dharma ingkang kula kurmati saha kula tresnani.

Kaparenga kula sumela atur sawetawis, awit sumulih sarira Adhi kula Maruta-Dyah Irianti kekalih, ingkang hamengku damel ing dinten punika, namung saderengipun kula nglajengaken atur, kaparenga sumangga kula dherekaken ngaturaken puja puji syukur Alhamdulillah dene Gusti Allaoh SWT ingkang Maha Mirah, Maha Welas saha Maha Asih sampun kepareng ngluberaken berkah, rohmad hidayah saha inayah dateng kula lan panjenengan sedaya, satemah wilujeng boten wonten alangan satunggal punapa, saged rawuh saha ngestreni ing pahargyan prasaja ing dinten punika.

          Para rawuh, awit saking suka bingahing manah, persasat keluberan samodra madu, kajugrugan wukir sari, adhi kula kekalih ngantos boten kumawi matur piyambak ing ngarsa panjenengan, pramila miji dateng kula, hanalang basa, matur ing ngarsa panjenengan.

          Dere atur ingkang sepisan: kaparenga ngaturaken wilujeng, rawuh panjenengan, sinurung atur panuwun ingkang mawantu-wantu, dene panjenengan sampun kepareng nyisihaken wekdal saha nglonggaraken penggalih rawuh minangkani panyuwunipun adhi kula kekalih, salajengipun keparenga pinarak lenggah ngantos sak paripurnanipun pahargyan.

          Atur ingkang angka kalih: Ngaturi uninga bilih adhi kula kekalih, dinten punika netepi dharmaning sepuh, ngentas pitulus anakipun estri nama pun Rr. Viena Kusyana Irmanda, SH jinatu krama Bg. M. Aryo Wicaksono, SH. Jalu tanaya Bp/ Ibu Drs. Basuki M Rasyid suwita ing Wujil, Kec. Bergas Kab. Semarang. Wondene ijab kobul sampun kalampahan kalawau enjang tabuh/ jam 9.30 ing dalem Telukan, Grogol, Sukoharjo. Panyuwunipun adhikula kekalih, kaparenga para rawuh maringi doa pangestu wilujeng dateng anak Sri Panganten kekalih sumrambah ing sadayaipun. Salajengipun mugi tetepa dados jodhonipun , dados keluarga ingkang sakinah, mawahdah, warohmah, enggal dipun paringi momongan minangka tangguling katresnan. Amin..

          Para rawuh, adhi kula kekalih matur nuwun tumrap sedaya paring kasaenan panjenengan, ingkang wujud bandha, penggalihan eguh pratikel, wekdal saha tenaga, punapa malih dateng sanak sedherek, tangga tepalih, para krida dharma lan sanesipun, ingkang saestu saged mbyantoni kalampahanipun pahargyan kanthi lancar lan wilujeng.

          Menggah sedaya kasaenan panjenengan adhi kula tamtu mboten saged ngaturi piwales, ingkang punika mugi Alloh SWT ingkang maha mirah maringana leliru sak kathah-kathahipun.

          Para rawuh, tamu sinedhahan ingkang sinuba ing pakurmatan, adhi kula kekalih nglenggana, sanadyan dangu sak derengipun sampun karancang kanthi ngatos-atos, namung kalampahanipun mesthi wonten kekirangan, kalepatan, ingkang saged ndamel cuwoning penggalih, ingkang punika, lumantar kula adhi kula nyuwun agunging pangapunten.

          Semanten ugi kula ingkang matur hamakili, wonten tandang-tanduk muna-muni ingkang boten dados sarjuning penggalih, kula ugi nyuwun pangapunten.

          Puput pepuntoning atur, para rawuh taksih kasuwun pinarak lenggah kanthi mirunggan ngantos sak rampungipun, sinambi kersa angrahapi atur pasugatan ingkang kaaturaken. Ing wasana Wassalamu’alaikum Wr. Wb.